كفتة فراخ مشوية.. سريعة وشهية على "سفرة دايمة"

كفتة فراخ مشوية.. سريعة وشهية على "سفرة دايمة"


لو عايزة تعملي أكلة سريعة وفي نفس الوقت مغذية وشهية، وكمان تقدري تقدميها لأطفالك وتعجبهم، جربي معانا النهارده على "سفرة دايمة" طريقة كفتة الفراخ المشوية، وماتنسيش تبعتي لنا رأيك فيها.
كفتة الفراخ المشوية
المقادير:
1/ 2 كيلو أوراك فراخ مفرومة
2 حبة بصل مفروم
كوب بقدونس مفروم
2 ملعقة كبيرة بقسماط
ملح وفلفل
ملعقة صغيرة بهارات فراخ
عيدان شيش للشوي
الطريقة:
1- افرمي البصل واعصريه من المية كويس، وخلي المية على جانب، وبعدين اخلطي البصل ده مع الفراخ والبقدونس والبقسماط، وتبّليها بالملح والفلفل والبهارات.
2- اعجني الكفتة شوية لحد ما كل المكونات تتداخل كويس، وحطيها في التلاجة وسيبيها لمدة نصف ساعة علشان ماتفكش منك وانت بتشويها.
3- بعد كده ابدئي صبّعيها على الأسياخ، وبلي إيديك بمية البصل وانتي بتصبعيها علشان تدي لها نكهة وكمان تدي لها لون حلو، وحاولي تخلي الكفتة رفيعة علشان تتشوي كويس.
4- بعدين اشويها على الجريل أو في طاسة تكون مابتلزقش، وحاولي أول لما تحطيها على الشواية تقلبيها من كل الأجناب علشان تمسك كويس، وسيبيها لحد ما تستوي كويس، وقدميها مع سلطة الطحينة.. بالهنا والشفا.