محمد السيد يكتب للثورة والمظلومين

متقولوش الشمس بانت
لسه بدرى ع الشروق
عتمة الليل المغادر
راسمة وش الفجر كدبه
جوه منها ألف طوق
عتمة الليل المغادر لم تغادر
لسه بيننا الف غادر
لسه فى الجدران شقوق
متقولوش إن اللى ماشى
خد معاه 30 بوار
لسه جوه الحى حيه
قاعدة تنصب ليكو خيه
تلدغ اللى بخطوة فاكر
إنه حقق الانتصار
إنتو أصحاب القرار
علو صوتكم فوق غناهم
واطلبو حق اللى فات
لسه عايش بينكو قاتل
طول ما فيكم حد مات
أنتو أصحاب البلد دى
بالكراسى والمناصب
والشوارع والحارات
إنتو أصل الفرح فيها
وإنتو أجمل حاجة فيها
شبّكوا ايدكو فى أيديها
رجعو للحلم حقه
هاتو بكره من اللى سارقه
وارفضو نص الحلول
اقلعو جدر المذله
واقطعو كل الديول
النهار قرب ولكن
عايز اللى ينادى ليه
ده السكوت ع الظلم عورة
واللى يعمل نص ثورة
يحفر القبر بـإيديه



شعر

محمد السيد