افتح قلبك مع د.هبة يس(الطلاق أبغض الحلال..بس حلال يا جماعة)!!

كتبت "ن" رسالة طويلة إلى افتح قلبك, ملخصها يقول:
أنا متزوجة من 10 سنوات, وأم لثلاثة أطفال, زوجى قريب لوالدى, ويعلم الله كم رفضت هذا الزواج وحاولت مقاومته, لكن والدى أصر بشده, وهددنى أنى لن أدخل الجامعة إذا رفضت, اتخطبت لزوجى وأنا فى الثانويه العامة, لأن والدى كان خايف أدخل الجامعة، وأرتبط بأى شخص آخر, استمرت الخطوبة 5 سنوات لأن ظروف خطيبى المادية، كانت ضعيفة جدا, لدرجة أن والدى هو الذى سعى له فى عمل بقطاع البترول عشان يقدر يكمل مصاريف الزواج, كنت لازلت رافضه, ولازلت لا أشعر ناحيته بأى شىء, إلا أن الجميع قالوا إنك ممكن تحبيه بعد الزواج, لكن للأسف طباعة ماخلتنيش أحبه إطلاقا.

لقيته سلبى جدا, لا يقف لأى من أخواته لو أهانونى أو تطاولوا عليا, يتعمد الحط من شأنى أمام الناس، وبيننا وبين بعض, خاصة من ناحية الجمال, فقد اعترف لى مؤخرا بأنه مش عايزنى أحس بجمالى وبنفسى, والأخطر من ده كله أنه طماع ماديا جدا, فبعد زواجنا بفترة، والدى شغلنى فى البترول برضه عشان المصاريف, وعشان والدى بنفسه قال لى إن زوجى مالوش أمان، وإنه لازم يكون لى دخل يسندنى.
أشارك فى كل شىء النص بالنص, ثمن الشقة الجديدة, توضيبها, العفش, قسط العربية, وطبعا كل هدومى ومستلزماتى, لدرجة قلت له فيها إنى تعبت ومش قادرة أكمل وطلبت الطلاق, رد عليا بأنه مش ممكن يسيب الخير اللى أنا باجيبه ده يروح منه, تخيلي؟ أنا بقيت عبارة عن ممول بالنسبة له, فى مرة من مرات الخلاف بيننا تدخل والدى، وأصر أننا نكتب نص الشقة باسمى حفاظا لحقى, لأنه حس أنه ممكن يغدر بيا فى أى وقت.

علاقتنا الحميمة باردة جدا, معاملاتنا اليومية من سىء إلى أسوأ, استشرت طبيبة وقالت لى إنه مريض نفسيا, لقيت نفسى مع الوقت باعرف شخص تانى, وجوزى عرف وأهلى كمان, وبالرغم من كل ده لسه مش عايز يطلقنى, عشان مستخسرنى فى حد غيره.

طلبت الطلاق أكثر من مرة, لا هو موافق ولا أهلى واقفين فى صفى، رغم كل اللى هم عارفينه وشايفينه, هددته بالخلع قال لى انه هيقتلنى لو ده حصل, وقال لى بالحرف الواحد إن احنا يا قاتل يا مقتول.. بجد اتخنقت, مش قادره أعيش معاه ومش عارفه أعمل ايه؟

والى ن أقول:
انت قلت فى رسالتك إنك عارفه إنك غلطانه فى موضوع الشخص التانى اللى عرفتيه على جوزك, ود طبعا شىء لا خلاف فيه, و خط أحمر، الكل هيقف ضدك بخصوصه, لكن أنا شايفه انك غلطتى فى حاجه تانيه خالص, هى انك سيبتى نفسك لغاية ما وصلتى للدرجه دى, ليه؟, يا حبيبتى (لا يكلف الله نفسا إلا وسعها), يعنى احنا المفروض نتحمل ونصلح ونيجى على نفسنا بقدر احتمالنا, ولغاية ما تسمح طاقتنا, لكن انتى ماقدرتيش لدرجة إنك بدأتى تغلطى وترتكبى حرمانيه انت فى غنى عنها, ده مش صبر ولا تحمل, دى بداية طريق كله مخاطر وأخطاء ربنا وحده يعرف آخرها.

احنا فعلا لا نشجع الطلاق وخراب البيوت, وفعلا بنكره الانفصال, وفعلا هو أبغض الحلال, لكن مش لدرجة إن احنا ننسى إنه لسه حلال, وان ربنا شرعه زى ما شرع الزواج بالضبط, يبقى ليه نقسى على نفسنا؟ ليه نسيب الحلال عشان نمشى فى الحرام؟.

أنا بصراحة مش فاهمة موقف أهلك, ومش فاهمة ليه هم رافضين الانفصال رغم إنهم شاهدين على كل شىء, لكن معلش مش مهم, انت واحدة راشدة و ناضجة ومستقلة ماديا دلوقت, يعنى تقدرى تتصرفى لوحدك, انا مش باقولك قاطعيهم أو اعصيهم, لأ حاولى معاهم بالإقناع وبالحسنى الأول, ولو مالقيتيش استجابة, يبقى روحى لمحامى أحوال شخصية, واتكلمى معاه فى موضوع الخلع, واعرفى منه الوسائل القانونية لحمايتك أنت وأولادك من زوجك فى حالة إنه أصر على تهديدك بالقتل أو غيره.

نادر جدا ما أنصح بالطلاق, لكن أحيانا بيكون هو فعلا الحل الوحيد, لأنه مش من العقل، أو المنطق إن إحنا ندفن نفسنا بالحياة عشان جوازة ميتة ميتة.